年尾煮多餐

以為煮埋前晚一餐，蛇年就收爐，點知今日又煮，因為花老爺話放學返嚟想食飯，佢話一碗飯就夠，我本來諗住清清哋烚菜，蒸魚就算，十點幾先食，唔好食咁多。前 兩日買咗蓮藕同急凍豬手，但唔得閒整，不如今日整啦！聽晚又同姪女出街打邊爐團年，趁今日有啲時間，買定少少餸，馬年放假在家吃，去超市買咗西芹，日本大 白菜，台灣白苦瓜，鮮准山，澳洲穀飼牛肉。行行吓見到有豆卜，忽然想起Van同Cat都整咗鯪魚肉釀豆卜，不如我又湊熱鬧。結果，本來諗住清清哋的一餐，變得都幾豐富(一個人來說)。

南乳蓮藕炆豬手

蓮藕兩節，急凍豬手一隻。做法跟Van的方法做，但我最後沒有埋芡。調味過程中唔夠味，又再加，最後加埋份量大概係：南乳兩湯匙(連汁)、蠔油兩湯匙，生抽兩湯匙、冰糖一小粒。水至材料大半多啲，滾後轉小火炆個半鐘，我食既時候豬手未夠稔，但我接受，味道好啱味，餘下的再炆多二十分鐘，花老爺食嘅時候剛剛好。

我吃的時候 花老爺吃的時候

鯪魚肉釀豆卜

都係跟Van的方法做，但我最後不是放上湯埋芡，是湯上。因為想有少少菜，所以煮大白菜，想煮稔啲啲大白菜，落多啲水加幾片薑，加半粒雞湯粒(家X牌最傳統嗰隻)，平日烚翠玉瓜或者生菜，我只用1/4粒雞湯粒。菜煮好再加入豆卜滾一陣，熄火加少少胡椒粉。