羊年人日生日快樂

我唔係懶，因為覺得呢個羊仔蛋糕好切合羊年人日，

所以個個網友我都係送呢張！

祝各位人日事事稱心！身體健康！

2015羊年賀歲

明天往台灣過新年

在這裏預祝大家

羊年身體健康！

事事如意！

情人節平凡的浪漫

2月14日情人節，沒有特別慶祝。因為老師上星期請假，結果情人節那天要補課，老師真的有無搞錯！！哈哈！

上課前同花老爺去茶餐廳食下午茶，享受茶餐廳的浪漫。

公司通粉好足料：沙爹牛肉、餐肉、火腿、叉燒、雞蛋、仲有隱藏咗嘅腸仔添！我的豬扒通粉，還有我最鍾意嘅奶醬多！正！

二月份外食(1)

荷里活廣場：莆田

呢日上午考試，下午已安排節目，但都要食餐飯先出發。見商場開咗間新店，叫莆田(新加坡福健菜)，就去試吓啦！除咗豆腐煲有少少燶味，其他食物都不錯，尤其是芋頭，有點以拔絲芋頭。

九龍灣：Delifrance早餐

呢日星期日，花老爺早上要返學，所以早啲起身同佢食早餐。

MegaBox：日和號

花老爺本來要去IKEA睇吓有無啱嘅椅買返公司用，睇啱咗一張，但又怕高度不合適，要返公司再度呎吋，所以沒有買。加上年近歲晚，IKEA鬼咁多人，無乜心機行，就早啲食完飯返屋企再繼續大掃除。

本來想吃椰子雪糕，點知佢話賣晒！只剩波蘿雪芭，點知又得番一個，唯有一個兩份食啦！

元朗：新福聲

嗰日花老爺入元朗剪髮，咁我都電電佢啦！整完頭都搞到9點幾，問髮型師附近有咩好食？佢介紹呢間俾我哋，話抵食又唔錯，就去試吓。除咗白灼花螺外，價錢由40幾至80蚊，但碟碟都好大碟，以潮洲打冷嚟講，唔貴兼抵食。

荷里活廣場：抺茶館

是日抺廚房，所以一個人落街食，屋企樓下無咩好食，就過商場食，叫咗個炸雞飯套餐，再加個培煎茶。滿足！

中式法國黃油雞

年尾梗係要睇吓雪柜仲有啲咩，有就快啲食埋佢，上次清咗件肉眼扒同牛仔骨。個幾星期前，再睇吓今次要清埋啲咩先--係兩隻法國黃油雞。用香草焗以前已經試過喇！又唔想開焗爐，你話點煮好呢？

上個月去朋友屋企食飯，佢整咗隻白切雞，熱辣辣擺上檯，佢話要攤一陣先可以斬，唔係就甩皮。我哋嗰陣個個流晒口水，有得睇無得食，有人話不如就咁撕開食算啦！

於是我就諗用上湯浸，乾手淨腳。法國黃油雞唔算大隻，同花老爺一人一隻，用手撕開嚟食幾滋味，同場仲炒咗碟菜心，同埋大大隻啡磨菇，咁就一餐！好味，哈哈！

嗰煲雞湯點算，第二、三日用咗嚟煮麵啦！煮菜啦！一啲都無浪費架！

2015羊年商場剪影

新年仲有一個星期就到喇！各大商場已經一片喜氣洋洋咁款，去過三個商場，拍咗啲相，換吓個BLOG，等大家無咁悶啦！

鑽石山荷里活廣場，我就麻麻哋欣賞。

九龍灣德福廣場，今年呢個肥娃娃都幾得意，不過略為死板咗啲。

新蒲崗MIKIKI，日系卡通公仔，影得最多，皆因嗰日人唔算多，而且集中。

仲有兩餐

2015年1月原來仲有兩餐，一餐自己煮，一餐出去食。

嘩！自己煮，唔係呀！好耐無煮過嘢喎！

係呀！年尾雪柜清倉吖嘛！冰箱有件惠康First Choice 嘅肉眼扒，有包牛仔骨，解決咗佢先。

肉眼扒一開二，兩個人食唔夠分，唯有咁啦！買咗兩個細嘅翠肉瓜，一盒磨菇。牛仔骨要嚟焗，用韓式燒肉汁醃。

另外買咗個木瓜，車厘咖，羅文生菜做沙律。

扒唔係我煎，係花老爺煎嘅，因為佢成日話煎得太熟，煎完扒啲油，用來煎翠肉瓜同炒磨菇。

第二餐好簡單，去咗太子食牛肚撈麵同淨魚角，唔記得舖頭叫咩名，因為花老爺喺太子做完嘢，就近食。點解食咁少，因為仲要留肚食甜品。

227甜棧：我哋叫咗原隻木瓜燉花膠、地瓜芋圓紫米紅頭湯、黃金小丸子白雪卷，仲有清清哋嘅杞子菊花茶漱口(自己斟)！

呀！差啲唔記得，有一日覺得天氣乾燥，實在頂唔順，煲過一次竹蔗、茅根、紅蘿蔔、粟米、馬蹄糖水添！連半粒冰湯都無落過呀！正！