食食食

2014年就唔好講，2015年1月都食咗幾餐。

本陣：觀塘APM。呢間本來係我以前食開間牛陣，好旺架！唔知點解好地地由日式火鍋轉做日式燒肉。

Ruby Tuesday：德福廣場。姨甥女間中都鍾意去呢度食，因為做咗會員，呢日又嚟食過。

Misocool：荷李活廣場。嗰日一個人唔知食咩？就行咗入去，叫咗炸蠔同一碗唔記得叫咩嘅麵，一睇就知係辣，所以叫咗杯凍檸茶。

陳師傅點心：新蒲崗。又係一個人，所以行入去食。結果春卷有芫茜，格硬食咗一條，兩條留番俾花老爺。

丼丼屋：荷李活廣場。三個人去食，其他食物無影，只係影咗甜品。

韓松：佐敦柯士甸道。呢日睇完音樂劇「俏紅娘」，未夠六點，不如早啲食，由文化中心搭一個站巴士，再行十分鐘。平時呢間一定要訂位，不過兩人，又咁早，就無問題啦！

銀杏館：太子。以前去蘭饎館食嘢嗰陣，成日話要幫襯佢，尋日終於嚟食。因為花老爺在太子有工作，我就就吓佢出太子，本來都係諗住去蘭饎館，但望到銀杏館，擇日不如撞日，就入去食。好彩我哋兩個人，因為無訂位，所以坐得有點迫，不過無所謂。食物價錢唔算平，但伯伯好好人，見我哋食完飯再叫阿B婆婆豬腳薑，問我哋係咪唔夠飽，查實係我哋食食吓先見到貼在牆上的海報，所以叫一個試吓，伯伯仲話，早啲叫，啲醋可以要嚟撈飯。埋單我哋俾咗貼士，伯伯又話貼士係捐俾慈善機構，還指指牆上的海報給我們看。